Esta liña de traballo enfócase no estudo do papel do océano e da súa interacción coa atmosfera na dinámica do sistema climático, así como dos seus impactos ambientais.
Analízanse os procesos de intercambio e transporte de humidade, calor e enerxía, e a súa influencia sobre a variabilidade climática, a ocorrencia de eventos extremos como secas e precipitacións intensas e os seus impactos nos ecosistemas. Así, a liña céntrase no estudo dos procesos físicos e termodinámicos que conectan a variabilidade oceánica e atmosférica coa ocorrencia, intensificación e persistencia de eventos climáticos extremos. En particular, analízanse os mecanismos mediante os cales as anomalías de temperatura superficial do mar e de salinidade, os patróns de circulación atmosférica, o transporte de humidade e os cambios no balance enerxético modulan fenómenos como secas, ciclóns, ríos atmosféricos, precipitacións intensas ou ondas de calor.
O enfoque combina a análise observacional, a modelación climática e hidrolóxica e ferramentas estatísticas avanzadas para identificar relacións a diferentes escalas espaciais e temporais. Os resultados contribúen a mellorar a comprensión dos mecanismos que controlan os extremos climáticos, a súa atribución física e o seu impacto potencial sobre os recursos hídricos, os ecosistemas, a economía e a sociedade. Preténdese avanzar na comprensión destes procesos e avaliar como poden modificarse nun contexto de cambio global, así como as súas implicacións para os riscos climáticos e ambientais.
Impulsores
- Milica Stojanovic (coordinadora). EPhysLab. Axudas para completar a etapa de formación posdoutoral, Xunta de Galicia, ata 2027.
- Albenis Pérez Alarcón (coordinador). EPhysLab. Axuda posdoutoral, Xunta de Galicia, ata 2027.
- Jorge Eiras Barca. EPhysLab. Ramón y Cajal, ata 2030.
- Rogert Sorí Gómez. EPhysLab. Ramón y Cajal, ata 2027.
Técnicas e servizos que ofrecemos
- Técnicas de downscaling (modelado WRF) para mellorar a resolución dos modelos climáticos globais. Dispoñibilidade de varias variables climáticas en alta resolución e posibilidade de procesar novas variables de interese.
- Modelización lagranxiana do transporte atmosférico de humidade mediante FLEXPART e asesoramento na avaliación de extremos e riscos hidroclimáticos baixo escenarios de cambio climático.
- Asesoramento científico-técnico na identificación e a análise de eventos hidrometeorolóxicos extremos (secas, inundacións, precipitacións extremas e ondas de calor) e os seus mecanismos atmosféricos asociados.
Bibliografía destacada
- Pérez-Alarcón, A., Coll-Hidalgo, P., Fernández-Álvarez, J. C., Trigo, R. M., Nieto, R., & Gimeno, L. (2023). Impacts of tropical cyclones on the global water budget. npj Climate and Atmospheric Science, 6, 212. https://doi.org/10.1038/s41612-023-00546-5
- Gimeno, L., Vázquez, M., Eiras-Barca, J., Sorí, R., Stojanovic, M., Algarra, I., Nieto, R., Ramos, A. M., Durán-Quesada, A. M., & Dominguez, F. (2020). Recent progress on the sources of continental precipitation as revealed by moisture transport analysis. Earth-Science Reviews, 201, 103070. https://doi.org/10.1016/j.earscirev.2019.103070
- Stojanovic, M., Pérez-Alarcón, A., Sorí, R., Nieto, R., & Gimeno, L. (2026). Atmospheric rivers are associated with nine out of every 10 floods in major global river basins. npj Natural Hazards, 3, 6. https://doi.org/10.1038/s44304-026-00167-x